Maa - Mother

Kis maa ki kahani likhu?
Dharti maa ki, bharat maa ki?
Janam dene vali ki, ya fir pal pos kar bada karne vali ki?
Vo apna sa beta samajh kisi ko apnane vali ki ?
Ya haar maa ki hifazat ke liye un beto ki shahdat ki kahani likhu?
Ya fir aise veer beto ko janam dene vali maa ki kurbaani likhu?
Ya duniya bhar ka kasht jhelti hamare karan dharti maa,
fir bhi humara bharan-poshan karne ki uski bholi adaat purani likhu?
Ae maa tera konsa roop likhu?
Tera pyar likhu ya dard likhu?
Tera tyag likhu ya tere balidan likhu?
Ya teri mehnat se, tujhse mili pehchan likhu?
Tere anchal se mili vo chav likhu, ya tune jo sahi uske badle dhup likhu?
Tera mera pet bhar ke, khud ne jo jheli bhukh likhu?
Vo garmi me tujhe jalati chuhle ki aanchein likhu?
Ya vo garmiyon ki sham-dopehari me mere liye bin bijli tere jhalte pankhe chalu likhu?
Vo jo tune laa ke diye khilone jinme rakhe vo aale likhu?
Ya thapkiyo se dho school ki maili dress meri tere hatho mein pade vo chaale likhu?
Ya fir meri balaye bhagate lambi umar vaale vo tere bandhe kaale dhaage likhu?
Ya fir ab tak sambhal rakhein mere pehle chote-chote kapde, kangan, Tagdi, Rumaal jisme vo sanduko ke taale likhu?
Ya mere dukho me baichen teri saansein likhu?
Ya jo tune ek acha insaan bnane ke liye jo sanskar diye vo baatein likhu?
Mere shaunk likhu ya teri jarurato mein katoti vale halat likhu?
Jigyasu tha to tujhse jaani haar baat ke, maa ye kya hai?
Ise kya kehte hai?
Is se kya hota hai?
Aisa kyo hai maa?
Ye apne tujhse seekhe-jaane sawalaat likhu?
Vo meri kamyabiyo me nikle tere khusiyo vaale aansu likhu ya?
Mere liye duniya se ladti bahaduri vaali teri nidar baatein likhu?
Ya tune jo raat bhar jaag-jaag mera dhyan rakha vo teri fiqarmand-snehpurna raatein likhu?
Tera mujhe chalna sikhana likhu, ya tera mere piche thali le daudna aur khilana, mera vo tujhe satana likhu?
Tere banaye un uuni(woolen) sweater ki garmahat likhu?
Ya mere ghar me chupke se ghuste hi tujhe pata chal jane vali aahat likhu?
Tera vo mujhe bachpan mein mai gir na jau sambhalna likhu?
Ya jis din bhatak gaya is uljhe jamane mein to tere ghadi pal ghadi dar ke maare badalte khayalat likhu?
Ya tune jo papa se minute-minute mein kiye vo baichen sawalat likhu?
Vo bahar ka majburi vala khana likhu?
Ya tera apne hath se khilana, pet bhar jaye par dil ka na bhar pana likhu?
Vo tujhse ashirwad lena likhu ya tera sir par hath rakh sehla dena?
Ya mujhe dar lagta tha raaton mein to vo tera behla dena?
Vo dr. ka injection lagate hi tera mujhse muh ferna likhu?
Ya tere saaye me kaati ek bachpan ki vo bemisaal umar likhu?
Teri jesi maa milna hai mushkil naseebo ke khel, aise bata mein faqra likhu...
Aisi maa har janam mile, sabko mile to us rab ka isme shukra likhu....
Bas naam uska kafi muskra kar apne lekho me  bas "Maa" likhu...
Maa😊